Գլխավոր հյուպատոսը հրավիրել է ընդունելություն Հայաստանում անցկացվելիք COP17-ին ընդառաջ

08 սեպտեմբերի, 2026

Լոս Անջելեսում ՀՀ գլխավոր հյուպատոսությունը Կալիֆորնիայի Գլոբալ կենսաբազմազանության դաշինքի հետ համատեղ Հյուպատոսությունում կազմակերպել է ընդունելություն՝ նվիրված հոկտեմբերին Երևանում կայանալիք ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովին (COP17)։

Դաշինքը համակարգում է COP17-ին մասնակցելու նպատակով Հայաստան մեկնող ԱՄՆ պատվիրակության ( COP17-ին մասնակցող ԱՄՆ-ի և Կալիֆորնիայի լայն ներկայացուցչական պատվիրակություն՝ նահանգային և տեղական ինքնակառավարման մարմինների ներկայացուցիչների, հասարակական կազմակերպությունների, ակադեմիական հաստատությունների և այլ շահագրգիռ կողմերի մասնակցությամբ) կազմակերպչական աշխատանքները։

Միջոցառմանը մասնակցել են Կալիֆորնիայի Նահանգային ժողովի, Լոս Անջելեսի քաղաքային խորհրդի անդամներ, Գլենդելի քաղաքապետը, Լոս Անջելեսի գործարար և ակադեմիական շրջանակների, քաղաքացիական հասարակության, հայկական համայնքի ներկայացուցիչներ։

Գլխավոր հյուպատոս Աննա Ավետիսյանը ներկայացրել է COP17-ին ընդառաջ իրականացվող նախապատրաստական աշխատանքները, Հայաստանի նախագահության առաջնահերթություններն ու տեսլականը, Հայաստանի հարուստ կենսաբազմազանությունը՝ ընդգծելով ՀՀ հանձառությունն ապահովելու ներառական, թափանցիկ և բոլոր շահագրգիռ կողմերի լիարժեք ներգրավվածությամբ համաժողովի անցկացում։

Գլխավոր հյուպատոսն իր խոսքում ընդգծել է կենսաբազմազանության ոլորտում Կալիֆորնիայի հետ համագործակցության ընդլայնման կարևորությունը։

Դաշինքի համահիմնադիր Ռոզալինդ Հելֆանդը ներկայացրել է COP17-ի շրջանակներում նախատեսվող տարբեր միջոցառումներին ամերիկյան պատվիրակության մասնակցությանն առնչվող հարցերն ու առաջնահերթությունները՝ պատրաստակամություն հայտնելով աջակցել COP17-ին մասնակցելու ցանկություն հայտնող շահագրգիռ կողմերին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր