Գլխավոր հյուպատոսը մասնակցել է «Կալիֆորնիա-Հայաստան միջազգային հարաբերություններ և առևտուր» խորագիրը կրող պանելային քննարկմանը

05 օգոստոսի, 2026

Գլխավոր հյուպատոս Աննա Ավետիսյանը մասնակցել է Կալիֆորնիայի Նահանգային ժողովի՝ Կալիֆորնիա-Հայաստան փոխադարձ առևտրի, արվեստի և մշակութային փոխանակման հարցերով հատուկ հանձնաժողովի անդրանիկ նիստի շրջանակներում կազմակերպված «Կալիֆորնիա-Հայաստան միջազգային հարաբերություններ և առևտուր» խորագիրը կրող պանելային քննարկմանը։

Հատուկ հանձնաժողովի անդրանիկ նիստը վարում էր Կալիֆորնիայի Նահանգային ժողովի անդամ Ջոն Հարաբեդյանը։ Բացման և ողջույնի խոսքերով հանդես են եկել Կալիֆորնիայի նահանգային ժողովի անդամներ Ջեսիկա Կալոսան և Նիկ Շուլցը։ Նիստին առցանց ձևաչափով մասնակցել և ելույթ է ունեցել ԱՄՆ-ում ՀՀ դեսպան Նարեկ Մկրտչյանը։

Պանելային քննարկմանը որպես բանախոսներ մասնակցել են Կալիֆորնիայի փոխնահանգապետ, Կալիֆորնիայի Առևտրի և միջազգային հարաբերությունների հարցերով ներկայացուցիչ Էլենի Կունալակիսը և Կալիֆորնիայի նահանգապետի՝ Բիզնեսի և զարգացման գրասենյակի՝ Եվրոպայի, Մերձավոր Արևելքի, Աֆրիկայի և Հնդկաստանի հարցերով պատասխանատու ներկայացուցիչ Թրիշա Աթերբեքը։

Գլխավոր հյուպատոսն իր խոսքում բարձր է գնահատել Հատուկ հանձնաժողովի ստեղծումը և հույս հայտնել, որ այն շարունակաբար ծառայելու է որպես կարևոր հարթակ Հայաստան-Կալիֆորնիա համագործակցության երկկողմ օրակարգին առնչվող հարցերի քննարկման համար։

Ա․Ավետիսյանը ներկայացրել է Հայաստան-ԱՄՆ երկկողմ հարաբերություններում արձանագրված առաջընթացը և նշել Հայաստան-Կալիֆորնիա շրջանակային համաձայնագրի դրույթների ամբողջական ու արդյունավետ կիրառման, ինչպես նաև դրանով սահմանված ոլորտներում փոխգործակցության խորացման կարևորությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր