Գլխավոր հյուպատոսը մասնակցել է Հայկական միջազգային բժշկական հիմնադրամի՝ «Կոխլեար իմպլանտացիա» ծրագրին նվիրված միջոցառմանը

12 ապրիլի, 2026

Գլխավոր հյուպատոս Աննա Ավետիսյանը մասնակցել է Հայկական միջազգային բժշկական հիմնադրամի կողմից կազմակերպված միջոցառմանը, որին հրավիրված էին նաև Լոս Անջելեսում Ճապոնիայի գլխավոր հյուպատոսը, Գլենդելի և Լոս Անջելեսի քաղաքային իշխանությունների ներկա և նախկին պաշտոնյաներ, բարերարներ։

Միջոցառման ընթացքում ներկայացվել է Հիմնադրամի գործունեությունը, լսողության խնդիրներ ունեցող երեխաների համար կոխլեար իմպլանտացիայի ծրագրի շրջանակներում Հայաստանում իրականացված բացառիկ վիրահատությունների արդյունքում ձեռք բերված հաջողությունները, հետազոտական ծրագրերը, առաջիկա անելիքները և Հայաստանի հետ շարունակական համագործակցությունը։

Գլխավոր հյուպատոսն իր ելույթում առանձնահատուկ կարևորել է Հիմնադրամի առաքելությունը և Հայաստանի համապատասխան մարմինների հետ համագործակցությունը, ինչը մեծապես նպաստել է Հայաստանի առողջապահական համակարգի առավել ամրապնդմանը, նորարարության խթանմանը և համապատասխան մասնագիտական կարողությունների զարգացմանը։ Գլխավոր հյուպատոսն իր երախտագիտությունն է հայտնել Հիմնադրամի հիմնադիր-նախագահ Սալփի Ագարակյանին կարևորագույն առաքելության համար և Կալիֆորնիայի համալսարանի պրոֆեսոր, բժիշկ Ակիրա Իշիյամային, որը տասնամյակներ շարունակ իր արդյունարար ներդրումն է ունեցել Հայաստանում առողջապահության զարգացման գործում՝ մարմնավորելով նաև ընդհանուր մարդասիրական արժեքների վրա հիմնված Հայ-ճապոնական ամուր բարեկամությունը։

Երեկոյի պատվավոր հյուրերն էին ՀՀ-ում ԱՄՆ նախկին դեսպան Քրիստինա Քվինը, ներկայում՝ Միջազգային քաղաքականության խաղաղօվկիանոսյան խորհրդի նախագահ և Լոս Անջելեսի քաղաքապետի՝ Խոշոր միջոցառումների հարցերով գրասենյակի ղեկավար Փոլ Կրեկորյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր