Շշուկների մատյան

06 մարտի, 2018

Մարտի 6-ին, Լոս Անջելեսում ՀՀ գլխավոր հյուպատոսության և Հայ-ռումինական մշակութային ասոցիացիայի նախաձեռնությամբ, Գլենդեյլի հանրային գրադարանում տեղի ունեցավ հանդիպում ռումինահայ գրող, քաղաքական գործիչ, Ռումինիայի սենատի անդամ Վարուժան Ոսկանյանի հետ: Երեկոյի ընթացքում ներկայացվեց նրա “Շշուկների մատյան” հայտնի գրքի անգլերեն տարբերակը: Գրքում հեղինակը ներկայացնում է Հայոց ցեղասպանության ողբերգությունը, փաստերով մանրամասնում պատմական դեպքերն ու իր ընտանիքի օրինակով ցույց տալիս ցեղասպանության ողբերգությունը հայ ընտանիքի համար: Շշուկների մատյանը թարգմանվել է 22 լեզվով և ներկայացվել ավելի քան 50 երկրում՝ համաշխարհային ճանաչում բերելով հեղինակին: Վարուժան Ոսկանյանն արժանացել է բազմաթիվ միջազգային մրցանակների: 2013-2015 թվականներին Հայաստանի, իսկ 2013-2014 թվականներին Ռումինիայի և Իսրայելի գրողների միությունների կողմից առաջադրվել է գրականության Նոբելյան մրցանակի: Շշուկների մատյանն առաջին անգամ հրատարակվել է 2009 թվականին Ռումինիայում և ճանաչվել Տարվա լավագույն գիրք:

Լոս Անջելեսի հայ համայնքի հետ հանդիպմանը Վարուժան Ոսկանյանը ներկայացրեց գրքի ստեղծման պատմությունը և առաքելությունը, որն ակամա ստանձնել է՝ աշխարհի տարբեր լեզուներով գիրքը թարգմանելով:

Հյուպատոս Արմելլա Շաքարյանը Վարուժան Ոսկանյանին հանձնեց ՀՀ գլխավոր հյուպատոսության կողմից պատվոգիր Հայոց ցեղասպանության միջազգային ճանաչման և դատապարտման գործում նշանակալից ավանդի համար:

Մարտի 2-ին Վարուժան Ոսկանյանի Շշուկների մատյան գիրքը ներկայացվեց Լոս Անջելեսի “Հանդուրժողականության թանգարանում”: Միջոցառմանը ներկա էին Լոս Անջելեսում Ռումինիայի և Ճապոնիայի գլխավոր հյուպատոսները, հրեական, ռումինական և հայ համայնքների ներկայացուցիչներ:

Իր ելույթում Արմելլա Շաքարյանը Վարուժան Ոսկանյանին երախտագիտություն հայտնեց Լոս Անջելես այցելելու, Շշուկների մատյան գիրքը տարբեր ազգերի ընթերցասերներին ներկայացնելու և դրանով իսկ Հայոց ցեղասպանության իրազեկման և դատապարտման գործին մեծապես աջակցելու համար:

Հանդիպման ավարտին Վարուժան Ոսկանյանը պատասխանեց ներկաների հարցերին, որոնց մեջ կային նաև Հոլոքոստի ականատեսներ: Տեղի ունեցավ նաև գրքի ստորագրման արարողություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր