Գլխավոր հյուպատոսն այցելել է Կալիֆորնիայի համալսարանի Փրոմիս ինստիտուտ

11 մայիսի, 2026

Գլխավոր հյուպատոս Աննա Ավետիսյանն այցելել է Կալիֆորնիայի համալսարանի (UCLA) Փրոմիս ինստիտուտ (Promise Armenian Institute)։ Այցի ընթացքում Գլխավոր հյուպատոսը հանդիպում է ունեցել Կալիֆորնիայի համալսարանի` միջազգային ուսումնասիրությունների և գլոբալ ներգրավվածության հարցերով ռեկտորի տեղակալ, պրոֆեսոր Սինդի Ֆանի, Փրոմիս ինստիտուտի տնօրեն, պրոֆեսոր Անն Կարագյոզյանի և Ինստիտուտի պրոֆեսորադասախոսական անձնակազմի հետ։

Այցի ընթացքում Գլխավոր հյուպատոսին են ներկայացվել Ինստիտուտի գիտակրթական գործունեության հիմնական ուղղությունները՝ Հայագիտական հետազոտություններ, Հայոց ցեղասպանության և Միջճյուղային/ ինտերդիսցիպլինար ուսումնասիրություններ, և առանձին ոլորտներում իրականացվող կրթական ծրագրերը, ինչպիսիք են՝ առողջապահությունը, հնագիտությունը, ազգագրությունը, hասարակական գիտությունները (սոցիոլոգիա), ճարտարագիտությունն ու ֆիզիկական գիտությունները, հայկական երաժշտությունը, արվեստը և մշակույթը։

Գլխավոր հյուպատոսը, բարձր գնահատելով Հարավային Կալիֆորնիայի նշանավոր համալսարաններից մեկում 2019 թվականից ի վեր գործող հայագիտական ինստիտուտի գործունեությունն ու առաքելությունը, կարևորել է Հայաստանի հետ շարունակական համագործակցությունը՝ առանձնահատուկ նշելով Հայաստանի կրթական հաստատությունների և հետազոտական կենտրոնների հետ սերտ փոխգործակցությունը, ուսանողների փոխանակման ծրագրերի իրականացումը և լավագույն փորձի փոխանակման/ուսումնասիրման նպատակով մասնագիտական և ոլորտային փոխայցելությունների կազմակերպումը։

Այցի ավարտին Գլխավոր հյուպատոսը շրջայց է կատարել Ինստիտուտում, Կալիֆորնիայի համալսարանի և ուսանողական քաղաքի/կամպուսի տարածքում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր