ԼՈՍ ԱՆՋԵԼԵՍՈՒՄ ՀՀ ԳԼԽԱՎՈՐ ՀՅՈՒՊԱՏՈՍ, ԴԵՍՊԱՆ ԱՐՄԵՆ ԲԱՅԲՈՒՐԴՅԱՆԸ ՀԱՆԴԻՊԵՑ ԿԱԼԻՖՈՐՆԻԱՅԻ ՆԱՀԱՆԳԱՅԻՆ ԱՍԱՄԲԼԵԱՅԻ ԱՆԴԱՄ ԲԼԱՆԿԱ ՌՈՒԲԻՈՅԻ ՀԵՏ

29 մարտի, 2021

ԳԼԵՆԴԵՅԼ- Լոս Անջելեսում ՀՀ գլխավոր հյուպատոս, արտակարգ և լիազոր դեսպան Արմեն Բայբուրդյանը հեռավար հանդիպում ունեցավ Կալիֆորնիայի Նահանգային Ասամբլեայի անդամ Բլանկա Ռուբիոյի հետ։ Դեսպան Բայբուրդյանը երախտագիտություն հայտնեց Բլանկա Ռուբիոյին Կալիֆորնիայի հայկական օրենդրական խմբակցությանն անդամակցելու և երեք տարի շարունակ խմբակցության հայանպաստ աշխատանքներին մասնակից լինելու համար։

Բլանկա Ռուբիոն նշեց, որ թեև իր ընտրատարածքում ընդգրկված չեն հայահոծ համայնք ունեցող կալիֆորնիական քաղաքները, սակայն հայ համայնքի հետ սերտ համագործակցություն առկա է բազմամշակութային Կալիֆորնիայի ամբողջ տարածքում։ Ասամբլեայի անդամ Ռուբիոն ուրախություն հայտնեց, որ ջերմ համագործակցության դաշտ է ստեղծվել Կալիֆորնիայի նահանգային խորհրդարանի հայկական օրենդրական խմբակցության միջոցով, ինչի շնորհիվ համայնքային շփումներն ու սերտ հարաբերությունները փոխադրվում են նաև օրենսդրական հարթություն։

Զրուցակիցները քննարկեցին Հայաստանի և Կալիֆորնիայի համագործակցության ուղղությունները։ Գլխավոր հյուպատոսը նշեց, որ 2019թ․ Հայաստանի և Կալիֆորնիայի միջև ստորագրված Շրջանակային համաձայնագիրը նպաստավոր հիմք է հանդիսանում երկկողմ հարաբերությունների խորացման համար։

Դեսպան Բայբուրդյանը Բլանկա Ռուբիոյին ներկայացրեց Թուրքիայի աջակցությամբ Արցախի դեմ իրականացված ադրբեջանական ագրեսիայի հետևանքները և պատերազմից հետո ստեղծված մարդասիրական ճգնաժամից բխող խնդիրները։ Զրուցակիցները կարևորեցին Ադրբեջանի կողմից հայ ռազմագերիների և պատանդի կարգավիճակում գտնվող քաղաքացիական անձանց անհապաղ ազատ արձակման հարցը։ Նրանք պահվում են Ադրբեջանում ի խախտումն 2020 թվականի նոյեմբերի 9-ի եռակողմ հայտարարության դրույթների։

Բլանկա Ռուբիոն ներկայացնում է Կալիֆորնիայի Ասամբլեայի 48-րդ ընտրաշրջանը՝ 2016 թվականից։ Նա անդամակցում է Ասամբլեայի Տարեցության և երկարաժամկետ հոգածության հարցերով, Բյուջետային, Ընտրությունների, Կառավարական կազմակերպության, Կանոնակարգի, Ջրի, այգիների և կենդանական աշխարհի մշտական հանձնաժողովներին, ինչպես նաև նախագահում է Ընտանեկան բռնության հարցերով հատուկ հանձնաժողովը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր