ԼՈՍ ԱՆՋԵԼԵՍՈՒՄ ՀՀ ԳԼԽԱՎՈՐ ՀՅՈՒՊԱՏՈՍ, ԴԵՍՊԱՆ ԱՐՄԵՆ ԲԱՅԲՈՒՐԴՅԱՆԸ ՀԱՆԴԻՊՈՒՄ ՈՒՆԵՑԱՎ ԿԱԼԻՖՈՐՆԻԱՅԻ ՆԱՀԱՆԳԱՅԻՆ ՍԵՆԱՏՈՐ ԱՆԴՐԵԱՍ ԲՈՐՋԵՍԻ ՀԵՏ

25 մարտի, 2021

ԳԼԵՆԴԵՅԼ- Լոս Անջելեսում ՀՀ գլխավոր հյուպատոս, արտակարգ և լիազոր դեսպան Արմեն Բայբուրդյանը հեռավար հանդիպում ունեցավ Կալիֆորնիայի նահանգային սենատի անդամ Անդրեաս Բորջեսի հետ։ Ողջունելով հանդիպման նախաձեռնությունը՝ սենատոր Բորջասը նշեց Հայաստանի, Արցախի և կալիֆորնիահայ համայնքի հետ իր ջերմ հարաբերությունների մասին։ Սենատորն ընդգծեց, որ մշտապես համագործակցել է նաև Լոս Անջելեսում ՀՀ գլխավոր հյուպատոսության և Ֆրեզնոյում ՀՀ պատվո հյուպատոսի գրասենյակի հետ՝ այդպիսով ակտիվ պահելով կապը թե Հայաստանի, թե հայ համայնքի հետ։

Դեսպան Բայբուրդյանը երախտագիտություն հայտնեց սենատոր Բորջեսին հայությանը հուզող օրակարգային հարցերին շարունակական աջակցության և համագործակցությանն ուղղված ջանքերի համար։ Նա նաև իր գնահատանքը հայտնեց սենատորին նախկին պաշտոններում նույնպես հայանպաստ կեցվածքի համար։

Զրուցակիցներն անդրադարձան Արցախի նկատմամբ Ադրբեջանի սանձազերծած պատերազմի թեմային, խոսեցին պատերազմի հետևանքների, մարդասիրական ճգնաժամի և պատերազմի պատճառով տեղահանված արցախցիների խնդիրների մասին։ Դեսպան Բայբուրդյանը և սենատոր Բորջեսը նաև կարևորեցին հայ ռազմագերիների անհապաղ ազատ արձակումը՝ իբրև օրակարգային կարևորագույն հարց։

Սենատոր Անդրեաս Բորջեսն ասաց, որ բազմաթիվ այցեր է կատարել Հայաստան և Արցախ և նշեց, որ առաջիկայում նույնպես կցանկանար այցելել։

Զրուցակիցները պայմանավորվեցին հաջորդ հանդիպումը կազմակերպել Ֆրեզնոյում, որը գտնվում է սենատոր Բորջեսի ընտրաշրջանում։ Դեսպան Բայբուրդյանը նշեց, որ կալիֆորնիահայության ակունքները գնում են դեպի Ֆրեզնո, որտեղ առաջին հայերը հաստատվել են դեռևս 19-րդ դարի վերջին։

Կալիֆորնիայի նահանգային սենատոր Անդրեաս Բորջեսը ԱՄՆ Հանրապետական կուսակցության անդամ է։ Սենատում ներկայացնում է ութերորդ ընտրաշրջանը, որում ներառված է նաև հայաշատ Ֆրեզնոն։ Սենատոր Բորջեսը հանդիսանում է Կալիֆորնիայի սենատի գյուղատնտեսական հանձնաժողովի նախագահը, Դատական հանձնախմբի փոխնախագահը, ինչպես նաև անդամակցում է Էներգետիկ, կոմունալ և հաղորդակցության հարցերով, Կառավարական կազմակերպության, Ապահովագրության, Բնական և ջրային պաշարների հանձնաժողովներին։ Սենատոր Բորջեսը Կալիֆորնիայի հայկական օրենդրական խմբակցության անդամ է, ինչպես նաև անդամակցում է Կալիֆորնիա-Հայաստան և Արցախ համատեղ առևտրի, արվեստի և մշակութային փոխանակման հատուկ հանձնախմբին։ Սենատոր Բորջեսը հայտնի է Կալիֆորնիայի հայկական և հունական համայնքների հետ սերտ գործակցությամբ։ Իր քաղաքական գործունեության ընթացքում մշտապես հանդես է եկել Հայոց ցեղասպանության ճանաչման դիրքերից։

Անդրեաս Բորջեսը 2008 թվականին ընտրվել է Ֆրեզնոյի քաղաքային խորհրդի անդամի, 2012 թվականին՝ Ֆրեզնոյի մարզի կառավարիչների խորհրդի անդամի պաշտոններում, 2018 թվականից Կալիֆորնիայի սենատի անդամ է։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր