ԼՈՍ ԱՆՋԵԼԵՍՈՒՄ ՀՀ ԳԼԽԱՎՈՐ ՀՅՈՒՊԱՏՈՍ, ԴԵՍՊԱՆ ԱՐՄԵՆ ԲԱՅԲՈՒՐԴՅԱՆԸ ՀԱՆԴԻՊԵԼ Է ԿԱԼԻՖՈՐՆԻԱՅԻ ՆԱՀԱՆԳԱՅԻՆ ԱՍԱՄԲԼԵԱՅԻ ԱՆԴԱՄ ԱԴՐԻՆ ՆԱԶԱՐՅԱՆԻ ՀԵՏ

15 մարտի, 2021

ԳԼԵՆԴԵՅԼ - Լոս Անջելեսում ՀՀ գլխավոր հյուպատոս, արտակարգ և լիազոր դեսպան Արմեն Բայբուրդյանը հանդիպել է Կալիֆորնիայի նահանգային ասամբլեայի անդամ Ադրին Նազարյանի հետ, որը նաև Կալիֆորնիայի հայկական օրենսդրական խմբակցության անդամ է։ ՀՀ գլխավոր հյուպատոսությունում տեղի ունեցած հանդիպման ընթացքում զրուցակիցները քննարկել են Հայաստան-Կալիֆորնիա հարաբերությունների զարգացմանը և հեռանկարներին վերաբերող հարցեր։ Նրանք վեր են հանել Կալիֆորնիայում նահանջի փուլ թևակոխած համավարակի այս շրջանում երկկողմ բազմաբնույթ հարաբերությունների առկա ներուժն առավելագույնս օգտագործելու խնդիրը։ Հայաստանի և Կալիֆորնիայի հարաբերությունների երկկողմ իրավական դաշտը խարսխված է ՀՀ-ի և Կալիֆորնիայի միջև 2019 թվականի սեպտեմբերին ստորագրված համագործակցության շրջանակային համաձայնագրի վրա։ Հանդիպման մասնակիցները խոսել են նաև հետպատերազմյան շրջանում ինչպես Արցախում և Հայաստանում, այնպես էլ ամբողջ տարածաշրջանում ստեղծված իրավիճակի մասին։ Հատուկ կարևորվել է Ադրբեջանում պահվող հայ ռազմագերիների անհապաղ ազատման խնդիրը։

Ադրին Նազարյանն ԱՄՆ դեմոկրատական կուսակցության ներկայացուցիչ է։ Նա ընտրվել է նահանգային ասամբլեայում 2012 թվականի նոյեմբերին՝ ներկայացնելով Կալիֆորնիայի 46-րդ Ասամբլեայի ընտրաշրջանը, որն իր մեջ ներառում է Հոլիվուդ Հիլզը, Լեյք Բալբոան, Նորթ Հիլզը, Նորթ Հոլիվուդը, Պանորամա Սիթին, Շերման Օքսը, Ստուդիո Սիթին, Թոլուկա Լեյքը, Վալի Գլենը, Յունիվերսալ Սիթին, Վեն Նայզը և Վալի Վիլեջը։ Նա նախագահում է Տարեցության և երկարաժամկետ հոգածության հարցերով Ասամբլեայի մշտական հանձնաժողովը, ինչպես նաև անդամակցում է Արվեստի, ժամանցային ինդուստրիայի, սպորտի, զբոսաշրջության և ինտերնետային լրատվության, Տրանսպորտի, Առողջապահության կոմիտեներին և Պետական կառավարման չորրորդ ենթակոմիտեին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր