ՖՐԵԶՆՈՅԻ ՄԱՐԶԻ ԿԱՌԱՎԱՐԻՉՆԵՐԻ ԽՈՐՀՈՒՐԴԸ ՄԻԱՁԱՅՆ ՆՈՐ ԲԱՆԱՁԵՎ Է ԸՆԴՈՒՆԵԼ ԱՐՑԱԽԻ ՀԱՆՐԱՊԵՏՈՒԹՅԱՆ ՃԱՆԱՉՄԱՆ ՎԵՐԱԲԵՐՅԱԼ

04 նոյեմբերի, 2020

ՖՐԵԶՆՈ - Նոյեմբերի 3-ին Ֆրեզնոյի մարզի կառավարիչների խորհրդի հինգ անդամները բանաձև են ընդունել, որում խորհուրդը դատապարտում է Արցախի և Հայաստանի նկատմամբ վայրագությունները, ԱՄՆ Կոնգրեսին կոչ է անում աջակցել զինադադարի անհապաղ հաստատմանը և վերահաստատում է իր աջակցությունը ազատ և անկախ Արցախի Հանրապետությանը։

Բանաձևում Ֆրեզնոյի կառավարիչները նշում են, որ Թուրքիան և Ադրբեջանը հարձակվել են Արցախի և Հայաստանի վրա՝ թիրախավորելով խաղաղ բնակչությանը և թշնամական գործողություններով վտանգելով Արցախի Հանրապետության ինքնիշխանությունն ու անվտանգությունը։

Փաստաթղթում արձանագրվում է նաև, որ 2013 թվականի ապրիլին Ֆրեզնոն դարձել է Կալիֆորնիայի առաջին մարզը, որը պաշտոնապես ճանաչել է Արցախի Հանրապետության անկախությունը։ Այդ բանաձևում Ֆրեզնոյի մարզի կառավարիչները նշել էին, որ ԼՂ-ը պատմականորեն հայկական տարածք է, որը, ի հեճուկս Ադրբեջանի հարձակումների, պահպանել է ազատ երկրի բոլոր հատկանիշները։

Հիշեցնենք, որ ս․թ․ հոկտեմբերի 12-ին Արցախի անկախության ճանաչման բանաձև էր ընդունել Ֆրեզնոյի քաղաքային խորհուրդը։ Փաստաթղթում նշվում էր, որ Թուրքիան և Ադրբեջանը հարձակվել են Արցախի և Հայաստանի խաղաղ բնակչության վրա՝ կիրառելով անօդաչու թռչող սարքեր և ներգրավելով ISIS-ի ահաբեկիչների՝ ցեղասպանությունը շարունակելու ակնհայտ առաքելությամբ։

Լոս Անջելեսում ՀՀ գլխավոր հյուպատոս, դեսպան Արմեն Բայբուրդյանը գոհունակություն է հայտնել Ֆրեզնոյում ՀՀ պատվավոր հյուպատոս Պերճ Աբգարյանի ջանքերի առնչությամբ և խնդրել վերջինիս փոխանցել Ֆրեզնոյի մարզի կառավարիչներին և Ֆրեզնոյի քաղաքապետին ու քաղաքային խորհրդի անդամներին իր խորին երախտիքը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր