Հանդիպում Վարուժան Ոսկանյանի հետ Լոս Անջելեսում ՀՀ գլխավոր հյուպատոսությունում

30 ապրիլի, 2019

Ապրիլի 26-ին Լոս Անջելեսում ՀՀ գլխավոր հյուպատոս դոկտ. Արմեն Բայբուրդյանը գլխավոր հյուպատոսությունում հյուրընկալել է Ռումինիայի խորհրդարանի պատգամավոր, Հայաստանի հետ բարեկամության խմբի նախագահ, Ռումինահայերի միության ղեկավար, գրող Վարուժան Ոսկանյանին:
Ջերմ մթնոլորտում նրանք զրուցել են Հայաստան-Սփյուռք կապերին, Կալիֆորնիայի հայ համայնքին, Սփյուռքի տարբեր գաղթօջախների միջև գործակցություն ծավալելու հեռանկարին առնչվող հարցերի մասին:
Դեսպան Բայբուրդյանը ողջունել է պատգամավոր Ոսկանյանի մասնակցությունը Հայոց ցեղասպանության 104-րդ տարելիցին նվիրված “Պահանջներ, հատուցում, արդարադատություն” խորհագրով համայնքային միջոցառմանը: Արմեն Բայբուրդյանը կարևորել է նաև Վարուժան Ոսկանյանի՝ Հայոց ցեղասպանության մասին պատմող “Շշուկների մատյան” վեպի տպագրությունը մոտ երկու տասնյակ լեզուներով: Արմեն Բայբուրդյանն ընդգծել է, որ գրքի լայն տարածումը կարևոր նպաստ է Հայոց ցեղասպանության միջազգային ճանաչմանը:
Զրուցակիցներն անդրադարձել են նաև Կալիֆորնիայի հայ համայնքին առնչվող խնդիրներին՝ կարևորելով Հայաստանից դուրս ապրող հայերի համար հայապահպանության ծրագրերի մշակումը և հայրենիքի հետ հարաբերությունների խթանումը՝ բոլոր ուղղություններով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր