Այց՝ Կալիֆորնիայի նահանգային սենատ

14 փետրվարի, 2019

Լոս Անջելեսում ՀՀ գլխավոր հյուպատոս դոկտ. Արմեն Բայբուրդյանը փետրվարի 14-ին աշխատանքային այցով մեկնել է Կալիֆորնիայի մայրաքաղաք Սակրամենտո, որտեղ հանդիպել է նահանգային սենատի նախագահ Թոնի Աթկինսի և սենատի Ֆինանսական հատկացումների հանձնաժողովի նախագահ Էնթոնի Փորթանթինոյի հետ: Հանդիպման առանցքում եղել է Հայաստանի և Կալիֆորնիայի միջև գործակցությունը բոլոր ուղղություններով, ներառյալ՝ տնտեսական, բարձր տեխնոլոգիաների, գյուղատնտեսության, զբոսաշրջության, կրթության ու մշակույթի ոլորտներում: Կողմերը քննարկել են Կալիֆորնիայի նահանգային սենատում գործող Կալիֆորնիա-Հայաստան-Արցախ առևտրի, արվեստի և մշակութային փոխանակումների հատուկ հանձնախմբի նախանշած ծրագրերը: Քննարկվել են Կալիֆորնիայի և Հայաստանի բազմաբնույթ գործնական կապերը խորացնելուն ուղղված քայլերը, այդ թվում՝ գործարար դաշտում: Սենատոր Փորթանթինոն նաև Կալիֆորնիա-Հայաստան-Արցախ առևտրի, արվեստի և մշակութային փոխանակումների հատուկ հանձնախմբի նախագահն է:
ՀՀ գլխավոր հյուպատոսի՝ Կալիֆորնիայի սենատ այցի առիթով սենատոր Փորթանթինոն նույն օրը ներկայացրել է օրինագիծ, որի համաձայն Հայաստանում պետք է վերաբացվի Կալիֆորնիայի առևտրի գրասենյակը: Ընթացակարգն անցնելուց և օրենք դառնալուց հետո այն հիմք կդառնա Հայաստանում ստեղծել Կալիֆորնիայի առաջին վերաբացված առևտրային գրասենյակը ԱՄՆ-ից դուրս: Նահանգային սենատում կայացած հանդիպումների ընթացքում ՀՀ գլխավոր հյուպատոսը սենատի նախագահի աջակցությունն է խնդրել օրինագծի ընդունման գործում: Նա նաև բարձր է գնահատել Կալիֆորնիայի նահանգային խորհրդարանի դիրքորոշումը Հայաստանի և ամերիկահայ համայնքի համար կարևորագույն խնդիրներում, ինչպիսիք են Արցախի միջազգային ճանաչումն ու Հայոց ցեղասպանության դատապարտումը:
Թոնի Աթկինսը դեմոկրատական կուսակցության ներկայացուցիչ է, 2018թ.-ին ընտրվել է սենատի նախագահ՝ դառնալով Կալֆորնիայի սենատի առաջին կին ղեկավարը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր