ՀՀ ԱԳՆ գլխավոր քարտուղարի այցը Լոս Անջելես

04 դեկտեմբերի, 2018

ԼՈՍ ԱՆՋԵԼԵՍ- ՀՀ Արտաքին գործերի նախարարության գլխավոր քարտուղար Վահագն Մելիքյանն աշխատանքային այցով գտնվում է ԱՄՆ արևմտյան ափում: Կարճատև այցի ընթացքում գլխավոր քարտուղարը հանիդպումներ է ունեցել Կալիֆորնիայի հայ համայնքի ներկայացուցիչների, հոգևոր առաջնորդների և քաղաքական կառույցների ղեկավարների հետ: ՀՀ գլխավոր հյուպատոս Արմեն Բայբուրդյանի մասնակցությամբ, Վահագն Մելիքյանը հանդիպումներ է ունեցել Հայ առաքելական եկեղեցու Հյուսիսային Ամերիկայի արևմտյան թեմի առաջնորդ Հովնան արքեպիսկոպոս Տերետերյանի, Հայ առաքելական եկեղեցու ԱՄՆ արևմտյան թեմի առաջնորդ Մուշեղ արքեպիսկոպոս Մարտիրոսյանի և Հյուսիսային Ամերիկայի Ավետարանական եկեղեցիների միության հովվապետ վերապատվելի Պերճ Ջամբազյանի հետ: Համայնքի հոգևոր առաջնորդների հետ ջերմ մթնոլորտում կայացած հանդիպումների ընթացքում քննարկվել են ամերիկահայ համայնքին առնչվող հարցեր: Վահագն Մելիքյանը նշել է, որ ՀՀ արտաքին քաղաքական գերատեսչության կողմից առանձնահատուկ կարևորվում են ԱՄՆ արևմտյան ափում տարվող աշխատանքները: Հանդիպումների մասնակիցներն ընդգծել են համայնքը համախմբելու կարևորությունը, ՀՀ գլխավոր հյուպատոսության դերն ու նշանակությունը համայնքի և Հայաստանի միջև կապերի աշխուժացման գործում: Կարևորվել է ամերիկահայ համայնքի հետ որոշակի ոլորտներում մասնագիտական փորձի փոխանակման կարևորությունը և երիտասարդներին համախմբելու և հայաստանյան նախագծերում ներգրավելու անրհաժեշտությունը: Շեշտվել է, որ ամերիկահայ համայնքում առկա է դեռևս լիովին չօգտագործված ահռելի ներուժ, որը համայնքային կառույցների, ՀՀ գլխավոր հյուպատոսության և Հայ եկեղեցու առաջնորդարանների համադրված աշխատանքի արդյունքում կիրառվելու դեպքումկարող է մեծ հաջողություններ արձանագրել:

ՀՀ ԱԳՆ գլխավոր քարտուղարը և ՀՀ գլխավոր հյուպատոսը հանդիպումներ են ունեցել նաև Հայ Դատի հանձնախմբի ԱՄՆ աևմտյան ափի ատենապետ Նորա Հովսեփյանի և Ամերիկայի հայկական համագումարի ԱՄՆ արևմտյան շրջանի տնօրեն Միհրան Թումաջյանի հետ: Վահագն Մելիքյանը ներկայացրել է հայաստանյան վերջին զարգացումները, երկրում առկա նոր իրողություններն ու դրական փոփոխությունների արդյուքները: Խոսվել է նաև ՀՀ գլխավոր հյուպատոսություն-համայնք բազմակողմ գործակցության ակտիվացմանն ու ամրապնդմանն ուղղված քայլերի մասին: Դիտարկվել են ամերիկահայ համայնքի հնարավորություններն առաջիկայում առավել խորությամբ օգտագործելու ուղիները, հայրենիքի հետ կրթամշակութային, առևտրատնտեսական կապերի խորացման հրամայականը: Հանդիպման մասնակիցները շեշտել են միասնաբար աշխատելու և սերտ գործակցելու նշանակությունը: Քննարկման ընթացքում կարևորվել է նաև Հայաստան-ԱՄՆ երկկողմ հարաբերություններ իխորացմանն ուղղված համակարգված քայլերի ձեռնարկումը, շեշտվել է հատկապես երկկողմ հարաբերության տնտեսական բաղադրիչը խթանելու անհրաժեշտությունը:

Հայ-ամերիկյան տնտեսական կապերն ընդլայնելու հնարավորությունները քննարկվել են ՀՀ գլխավոր հյուպատոսության աջակցությամբ Գլենդեյլում կայացած՝ Հայ-ամերիկյան գործարար խորհրդի նախաձեռնած բիզնես-ֆորումի ընթացքում, որին մասնակցել է նաև Վահագն Մելիքյանը: ԱԳՆ գլխավոր քարտուղարը ներկայացրել է Հայաստանում թավշյա հեղափոխությունից հետո ձևավորված մթնոլորտը, որը դրականորեն է ազդել նաև գործարար միջավայրի վրա: Վահագն Մելիքյանը շեշտել է դրսում ապրող ամեն հայի ներգրավվածության կարևորությունը հայրենիքի տնտեսական կյանքում՝ մեծ կամ փոքր գործարար ծրագրով: “Այդ ծրագրերի բնույթն ու ծավալը կարևոր չեն, կարևորը ձեր ներգրավվածությունն է”, շեշտել է նա: “Ոչ միայն Սփյուռքը՝ Հայաստանի համար, այլև Հայաստանը՝ Սփյուռքի. Մեն քպետք է ուս ուսի տանք ու միասին սատարենք մեր երիտասարդ սերնդին՝ մի քանի ամիս առաջ ձեռքբերած դրական իրողություները պահպանելու և դրանք մեր հայրենիքի ապագա զարգացման հիմք դարձնելու գործում”, իր ելույթում նշել է Վահագն Մելիքյանը:

Բիզնես-ֆորումին մասնակցել են Կալֆորնիայի նահանգային խորհրդարանի անդամ Ադրին Նազարյանը, Լոս Անջելեսի քաղաքային խորհրդի անդամ Փոլ Կրեկորյանը, մի քանի տասնյակ ամերիկահայ գործարարներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր