Գլենդեյլի դպրոցների բազմալեզու ծրագիրը

02 մարտի, 2018

Հյուպատոս Ամելլա Շաքարյանն այցելել է Գլենդեյլի Թ. Ջեֆերսոնի և Ռ. Ուայթի անվան դպրոցներ՝ ծանոթանալու Երկլեզու ուսուցման համակարգին, որը վերջին տարիներին հաջողությամբ ներդրված է այս դպրոցներում: FLAG կոչվող համակարգը աշակերտներին առաջարկում է անգլերենին զուգահեռ ուսուցողական նյութերը սովորել նաև մայրենի լեզվով: Ծրագրում, իբրև երկրորդ լեզու, ներառված է յոթ օտար լեզու՝ հայերեն, ֆրանսերեն, գերմաներեն, իտալերեն, ճապոներեն, իսպաներեն և կորերեն: FLAG ծրագրի մանրամասները Ա. Շաքարյանին ներկայացրել է Գլենդեյլի միացյալ կրթական մարմնի FLAG –ի կոորդինատոր Նենսի Հոնգը: Նրանք խոսել են նաև ՀՀ Կրթության և Սփյուռքի նախարարությունների հետ գործակցությունը շարունակելու անհրաժեշտության մասին, որն իրականացվում է ուսուցիչների վերապատրաստման և դասագրքերի ու ուսուցողական այլ նյութերի տրամադրման ծրագրերով:
Ա. Շաքարյանը ծանոթացել է FLAG ծրագրի հայերեն բաժնի աշխատանքներին, շրջել է դասարաններում, առիթ ունեցել ծանոթանալ տարբեր տարիքի հայ աշակերտների կարողություններին՝ հայոց լեզվի, հայ գրականության ու պատմության և այլ առարկաների հայերեն գիտելիքների մակարդակին: Ծրագրի ղեկավար Միգանուշ Մելքոնյանը հյուպատոսին ներկայացրել է հայերեն ուսուցման ծրագիրը, դասավանդման մեթոդներն ու հաջողությունները:
Գլխավոր հյուպատոսությունը վերը նշված դպրոցներին նվիրաբերել է Հայաստանի դրոշներ՝ ծրագրի շրջանակներում օգտագործվող դասարաններում փակցնելու համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր