Հանդիպում Կոլորադո նահանգում

11 հունվարի, 2016

Կոլորադոն դարձավ առաջին ամերիկյան նահանգը, որն ամրագեց դեկտեմբերի 6-ը՝ իբրև Ջուղայում Ադրբեջանի կողմից հայկական հնագույն խաչքարների ոչնչացման տարելիցի օր: Նահանգապետ Ջոն Հիքենլուփերի՝ այդ մասին ստորագրած հռչակագրում նշված է. Կոլորադո նահանգը դատապարտում է 10 տարի առաջ հայկական հնագույն 2000 խաչքարների ոչնչացումը: Ջուղայի միջնադարյան խաչքարների ամենամեծ հավաքածուի կանխամտածված ոչնչացումը փաստ է և արձանագրվել է գիտության զարգացման ամերիկյան ասոցիացիայի կողմից: Փաստաթղթում անդրադարձ կա նաև Հայոց ցեղասպանության 100-րդ տարելիցին, որը Կոլորադո նահանգում այս ապրիլին նշանավորվել է նահանգային կապիտոլիումի առջև խաչքարի տեղադրմամբ: Այն Ջուղայի ոչնչացված խաչքարներից մեկի կրկնօրինակն է:

Այդպիսով, Կոլորադո նահանգն աշխարհում առաջինն է, որի ղեկավար մարմնի առջև կանգնեցված է Հայոց եղեռնը և մեր օրերի մշակութային ցեղասպանությունը խորհրդանշող խաչքար: Այս այգում Կոլորադոյի հայ համայնքը կազմակերպել էր Ջուղայի մշակութային հարստության ոչնչացման 10-րդ տարելիցին նվիրված միջոցառում:

Հիշատակի միջոցառումից հետո Դենվերում կայացավ նահանգապետի հանդիպումը Հայաստանի գլխավոր հյուպատոսի հետ: Հանդիպման ժամանակ Ջոն Հիքենլուփերը Սերգեյ Սարկիսովին հանձնեց Ջուղայի խաչքարների ոչնչացման տարելիցի մասին իր ստորագրած հռչակագիրը: Հանդիպմանը մասնակցում էին Հայ Դատի հանձնախմբի ներկայացուցիչներ, Կոլորադոյի համայնքային կառույցների անդամներ:

Գլխավոր հյուպատոսը նահանգապետին հրավիրեց Հայաստան և Արցախ: Հրավերը սիրով ընդունվեց:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր