ՀՀ ԳԼԽԱՎՈՐ ՀՅՈՒՊԱՏՈՍՈՒԹՅՈՒՆԸ ԿԱԶՄԱԿԵՐՊԵՑ ԸՆԴՈՒՆԵԼՈՒԹՅՈՒՆ Ի ՊԱՏԻՎ ՀՀ ԱԺ «ԻՄ ՔԱՅԼԸ» ԽՄԲԱԿՑՈՒԹՅԱՆ ՂԵԿԱՎԱՐ ԼԻԼԻԹ ՄԱԿՈՒՆՑԻ

19 նոյեմբերի, 2019

ԳԼԵՆԴԵՅԼ - Նոյեմբերի 19-ին Լոս Անջելեսում ՀՀ գլխավոր հյուպատոս, դեսպան Արմեն Բայբուրդյանը ընդունելություն կազմակերպեց՝ ի պատիվ ՀՀ ԱԺ պատգամավոր, «Իմ քայլը» խորհրդարանական խմբակցության ղեկավար և Հայ-ամերիկյան բարեկամության խմբի նախագահ Լիլիթ Մակունցի։ Ընդունելությանը ներկա էին համայնքային առաջնորդներ, հասարակական, քաղաքական, կրոնական կառույցների ներկայացուցիչներ, տեղական պաշտոնյաներ։ Ողջունելով բարձրաստիճան հյուրին՝ դեսպան Բայբուրդյանը շեշտեց խորհրդարանական դիվանագիտության կարևորությունը։ Այդ համատեքստում նա գնահատանքի խոսք ասաց Հայ-ամերիկյան բարեկամության խմբի շրջանակում տարվող աշխատանքի առիթով և շեշտեց, որ այդ աշխատանքը էլ ավելի կխթանի ռազմավարական երկխոսության մակարդակի վրա գտնվող հայ-ամերիկյան հարաբերությունները։
Լիլիթ Մակունցը ներկայացրեց ԱՄՆ արևմտյան ափ կատարած այցի ընթացքում ունեցած պաշտոնական հանդիպումների արդյունքները։ Նա շեշտեց, որ խորհրդարանական դիվանագիտությունը հայ-ամերիկյան հարաբերությունները զարգացելու արդյունավետ հարթակներից է։ «Հայ-ամերիկյան բարեկամական խմբում ընդգրկված խորհրդարանականներով շատ որոշակի քայլերի և անելիքների առաջարկներով ենք հադնես գալիս երկկողմ հարաբերությունները խորացնելու նպատակով», ասաց Լիլիթ Մակունցը։ Խորհրդարանական մեծամասնության առաջնորդը հայտնեց նաև, որ հարաբերությունները խորացվում են տարբեր ուղղություններով՝ կիբերանվտանգությունից մինչև առևտրի ոլորտ։ Պատասխանելով ներկաների բազմաթիվ հարցերին՝ Լիլիթ Մակունցը ներկայացրեց նաև Հայաստանի նոր իրողությունները և ժողովրդավարական ինստիտուտների զարգացումը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր